٤ أفكار للحد من إكتئاب الحمل وإكتئاب ما بعد الولادة

الحامل و اللي بترضع هي اكتر الستات عرضه للاكتئاب عاشان كدا هنقول شويه نصايح عاشان الصحه النفسيه للام الحامل و المرضعه

١- دوري على مجموعة صحاب زيك .. يعني امهات في فترة مقاربة منك .. الناس لما بيشوفوا غيرهم بيمروا بتجارب مشابهه بتهون عليهم بتحسي انك مش ضعيفه و تعبانه و موودك بايظ لوحدك لا دي طبيعه مرحلة و هنساعد بعض فيها .. الي جانب ان تجاربكم كامهات و مشاركتها هيفرق معاكم كلكم جدا .. انزلوا اتمشوا كل يومين في حته .. روحوا لبعض البيت .. ساعدوا بعض في تعليم حاجة .. هتفرق جدا .. الانعزال بيزود كل المشاعر السلبيه و بيتعب اكتر

٢- الحركة .. اتمشي كل يوم نص ساعة في اي حته .. في النادي .. في المول .. بعربيه ابنك او بنتك .. هو هينام و انتي هتتمشي و حالتك النفسيه هتتحسن

٣- الفيتامينات .. اعملي كل سنه تحليل دم شوفي ايه اللي ناقص و استشيري اخصائيه مكملات غذائية و تغذية تقولك تاكلي ايه عاشان تحافزي على صحتك .. انتي دلوقتي بقيتي ام و صحتك مهمة جدا ..

٤- مارسي هواية بتفرحك و تكون بسيطه .. اقري .. اكتبي .. ذاكري .. اعملي كروشيه او تريكو .. الانجازات الصغيرة بتزود احساس الانسان بالسعادة و بتزود افراز هرمون السعادة

٥- خدي وقت في اليوم ان شاء الله ربع ساعة كل يوم اعملي حاجة تافهه .. العبي لعبه تافهه على الموبايل .. اتكلمي مكالمه مع صديقتك او اختك .. اقعدي ساكته مع مج شاي او نسكافيه .. حاجة بسيطه اوي هتفرق معاكي اليوم كله

٦- اخر حاجة دلوقتي هي انك تطلبي مساعدة .. اتعودي تطلبي مساعدة من جوزك .. من صحابك .. من اهلك .. و متحسيش ان مينفعش .. لا هو ينفع جدا .. اطلبيها و عرفيهم محتاجة ايه بالظبط و اتعودي تعملي كدا عاشان متلاقيش نفسك فجأة شايله كله و محدش معاكي

ايه رايكم في الافكار دي و في تنفيذها للحامل و الام الجديدة ؟

و ايه الحاجات اللي انتم نفسكم عملتوها و فرقت معاكم ؟؟

| Homemaker | Woman | Wife | Mum | Blogger | Supporting new moms, Passing knowledge & sharing positive vibes.
Leave a Reply

Your email address will not be published. Required fields are marked *