عرض و تقبل المساعدة للامهات الجدد

الفرق الشاسع في نفسية الست اللي جوزها ساندها و بيساعدها من غير كلام و معاها ايد بايد في البيت .. و نفسية الست اللي بتعمل كل حاجة و هي مضغوطة و حاسه انها لوحدها .. فرق بين السما و الارض .. الاولى هتبقى ام سعيدة و هتربي كويس لانها حاسه انها مش لوحدها و صعب جدا يجيلها اكتئاب بعد الولادة (له اسباب تانيه بس في سبب كبير اتشال) .. و التانية اكتر الستات عرضة لاكتئاب بعد الولادة ..

المشكلة في ايه بقى ؟ ان في نوع من الستات مش بيعرفوا يقبلوا المساعدة لما تتعرض عليهم .. و دول كتير اوي اوي في الوطن العربي .. الستات العربيات متبرمجات ان نجاحها في الحياه انها تشيل البيت و العيال لوحدها .. و انها اهانة لو حد ساعدها .. و في الاخر بتلاقي وقت لنفسها و افكارها بالعافيه جدا .. قبول المساعدة من الاخرين القريبين دي قدرة انسانية كبيرة مفيش ام سعيدة الا و لازم تحس بكدا .. تحس ان معاها في حياتها افراد متحملين المسئولية ..

انا مش ضد ان الست تشيل و لا ان هي في البيت و الراجل شغال طول اليوم .. دي ظروف اسرية .. بس في كلام بيريح اوي والله و انا حسيت ان رجالة كتير محتاجين يعرفوه

– اساعدك في حاجة يا حبيبتي ؟
– ربنا يكرمك انتي تعبانه معانا اوي و شايلة كله فوق دماغك
– انا من غيرك و لا حاجة
– تحبي اقعد / انزل بالاولاد في الاجازة و تريحي انتي ؟
– تحبي تخرجي مع صحابك ؟
– ممكن اريحك ازاي ؟
– شكرا
– من فضلك
– تسلم ايديك

الكلام ده كله بنزين و طاقة و تخصيص ربع ساعة يتعمل فيها اي حاجة في البيت تخليها هي تدعيلك شهر بعدها عاشان هتحس انها مسنودة .. انا عايزه بدل ما نعالج زوجات مكتئبات نتجنت اصلا .. واللسان الحلو وسيلة من وسائل التجنب و الراحة و الحاجات الحلوة كلها

النقطه المهمة هنا .. للبنات و الستات .. الله يخليكن لما يتقالكم الكلام ده بلاش ردود دبش من بتوع الستات النكديات المصريات .. و بلاش رفض للمساعدة .. و بلاش و انت من امتى بتساعد او يا سلام ايه ده او الحاجات الكئيبة اللي مخليه سمعتنا في الارض

اخر حاجة انا مش ملاك و كلامي ده كلام بروفيشنال بحت من التعامل في الشغل و الدراسة مع الامهات الجدد و الحوامل

ربنا يوفقنا كلنا و يقدرنا و يساعدنا

😀

ليلتكم سعيدة

😀

| Homemaker | Woman | Wife | Mum | Blogger | Supporting new moms, Passing knowledge & sharing positive vibes.
Leave a Reply

Your email address will not be published. Required fields are marked *