6 أفكار عن المكملات الغذائية و اسباب تحسن الصحة الجسدية و النفسية

1- الرياضة .. الرياضة حياة و انا بقول لنفسي بالذات عاشان بقالي متمرنتش من قبل رمضان و ربنا يهديني
2- اللي نعرف ناخده في اكل منخدوش في ادوية عاشان في الاخر المكملات دي ادوية و حبوب .. يعني
 
– اللي تعرف تلبس مايوه في مكان و تقعد في الشمس مرة في الاسبوع متاخدش فيتامين د
– اللي تعرف تاكل سمك موثوق مضدره مرتين في الاسبوع متاخدش اوميجا 3
– اللي تعرف تجيب زبادي من عند اللبان متاخدش كالسيوم
– اللي تعرف تاكل بيض بمعدل 3 مرات كل مرة بيضتين تبقى عملت جميلة كبيرة في نفسها
– اللي تعرف تشرب كوباية كركديه و معلقة عسل اسود متاخدش حديد
– اللي تعرف تاكل موزه كل يوم متاخدش بوتاسيوم
– اللي تعرف تاخد حبوب سمسم و حبوب بذور كتان تبقى متاخدش ماغنسيوم
 
و هكذا .. ده اللي بعد ما درست مؤمنة بيه .. الاكل دواء او داء .. تظبيط الاكل احسن من مليون حباية .. خطة اكل محترمة نعملها و نمشي عليها على الاقل لمرتين من مرات الاكل في اليوم هتغني عن حاجات كتير اوي
 
3- المياه .. المياه .. المياه .. و كمان المياه اللي منقوع فيها فواكه او خضروات .. او ديتوكس ووتر .. ننقع الحاجات و نشرب ..
 
4- اصلا لاننا بناكل غلط فمعظم الحبوب مش بتمتص و مش بتوصل للدم .. لان مثلا فيتامين د لازم يتاخد مع دهون .. الحديد لازم يتاخد مع فيتامين سي .. و الكالسيوم مع الماغنسيوم .. تظبيط ده في الاكل بيعمل حاجات كويسه فعلا
 
5- البكتيريا النافعه بقى .. نظام حياتنا ضايع و بعيد عن الطبيعة .. فالبكتريا اللي بتمتص الفايدة من الاكل اصلا قليلة جدا .. نزودها ازاي ؟ زبادي من اللبان .. زبادي حقيقي .. بيفرق في الهضم و الصحة و بيعمل معجزات
 
6- التدوير على مسببات الطاقة الايجابية .. المشي .. السباحة .. المياه .. بانيو فيه ملح بحر .. الصحيان الفجر و شم هواء الفجر .. الرقص بكل انواعه .. جلسات الحكي في دوائر ايجابية .. السفر للبحر ..
 
 
اعتقد ان اللي يعمل الحاجات دي هيتظبط .. ده برضه راي عملي كدراسة و ابحاث .. انا مش بعرف اعمل كدا في اوقات كتير .. بس يكفينا شرف المحاولة 😀
 

| Homemaker | Woman | Wife | Mum | Blogger | Supporting new moms, Passing knowledge & sharing positive vibes.
Leave a Reply

Your email address will not be published. Required fields are marked *