ايه هو الايبديورال ؟

ايه هو الايبديورال؟

الايبديورال هو نوع من انواع البنج النصفي .. مختلف عنه .. بيتركب في كانيولا مستمرة متصلة باعصاب الظهر .. يعني الست اللي بتولد بتاخد حقنة في ضهرها يتركب فيها شئ مشابه للكانيولا و متوصل بجهاز بيضخ كمية مخدر كل 20 دقيقة تقريبا .. لان هو تاثيره بيبدأ يروح بعد 20 دقيقه

ايه الفرق بينه و بين البنج النصفي؟

الايبديورال زي الكانيولا زي ما قلنا .. لكن البنج النصفي حقنة واحدة .. الايبديورال بياخد 20 دقيقة عاشان يشتغل .. البنج النصفي اسرع اوي  .. بيبقى 10 دقائق .. الايبديورال بيخدر الاعصاب و مش العضلات فممكن ندفع الجنين و عاشان كدا ينفع مع الولادة الطبيعية لكن البنج النصفي بيخدر كله مفيش اي احساس و لا قدرة على الدفع .. عاشان كدا بيستخدم غالبا في القيصري

بيتاخد امتى ؟

بعد ما الرحم يبقى فتح حوالي 5 سم .. ليه ؟ عاشان هو بيبرد الطلق و لو اقل من 5 ممكن يوقف الولادة كليا.. و في بعض الدول بيشيلوه قبل وقت الدفه ب 20 دقيقة او وقت الدفع بالظبط عاشان اسباب هنقولها تحت

فوائده؟

بيخلي الولادة الطف و اسهل و مفيش فيها تعب جامد و ممكن ننام و نريح لحد وقت ما الرحم يفتح .. بيزود الاسترخاء و الهدوء و بيهدي اعصاب الام

اثاره الجانبية؟

انا مش هقول الاثار الجانبية الطبيه .. عاشان هي مش قصتي و عاشان كل حاجة ليها اثار جانبية لكن هو بيفقد القدرة على الحركة اللي هي في نظري اهم حاجة في الولادة الطبيعية .. بيقفد القدرة على تجربة اوضاع مختلفة للولادة .. هو برضه بيزود نسب الولادة القيصري لان الاحساس بالطلق و الدفع الصحيح المبني على احساس اللي بتولد حاجة مهمة جدا لاتمام عملية الولادة الطبيعيه .. يعني برضه يقال ان ولادات الايبديورال اطول في مدتها عاشان الدفع بيستهلك وقت اطول .. و لو الدفع خد وقت طويل و نبض الجنين بقى في مستويات غير مفضلة بيضطروا انهم يكملوا الولادة قيصري .. برضه هو بيزود نسب الاحتياج لطلق صناعي لانه بيبرد الطلق و بيهديه فبيدوا طلق صناعي فبتكون الام و الطفل عرضة لمشاكل الطلق الصناعي اللي هنتكلم عنها في مقالة تانيه .. اخر حاجة هو بياثر على الطفل .. بيوصل في الدم و بيدروخ الطفل شويتين فيبقى مش مركز او نايم طول الوقت .. فالرضاعة ممكن تكون اصعب

طب نعمل ايه؟

التفضيل اللي بقترحه لكل الامهات هو تجربة الموقف من دون الايبديورال .. بس احيانا ممكن لو وقت الولادة طول نحتاج له .. لكن ليه لو ممكن نولد في ساعتين ؟ في بداية الشعور بالطلق احسن حاجة هو تسهيه النفس .. نتمشي و ناكل و نشرب و نتفرج على حاجة كوميدية .. و بعدين لما منعرفش خلاص اي حاجة نروح المستشفى ووقتها نقرر .. ممكن نروح نلاقي الرحم فتح 10 سم و يللا نولد او لسه 3 سم و في وقت كتير فناخد ايبديورال .. هو له فوائد و بيهون و ده في الولادات الطويلة حاجة كبيرة فعلا .. بس في القصيرة مالوش لازمه

دي كل افكاري و الله عرفته عن الايبديورال .. لو عندكم اي اسئلة تفضلوا بالرد و هرد عليكم في اقرب وقت

يومكم سعيد

🙂

| Homemaker | Woman | Wife | Mum | Blogger | Supporting new moms, Passing knowledge & sharing positive vibes.
Leave a Reply

Your email address will not be published. Required fields are marked *