تغذية الاطفال من 6 شهور لسنتين

تغذية الاطفال من 6 شهور لسنتين

موضوع مهم اوي و انا هكتب عنه دراستي و تجربتي الشخصية .. اولا كدا انا اتخدعت بموضوع نبدأ نأكل ولادنا 4 شهور عاشان وزنهم قليل .. و الحمدلله زي العادي ابني وقفلي و مبدأش الا لما كان جاهز و عايز .. فدي اهم حاجة ان الاطفال يبدوا يورونا اهتمام باكلنا و عايزين يدوقوا مش احنا اللي ندوقهم

اساليب الاكل كتيره اوي بس في حاجات اساسية كدا في كله:

اولا .. حاجة جديدة كل 3 ايام عاشان لو في حساسية نعرف هي من ايه

ثانيا .. لو ظهرت حساسية من حاجة .. نعمل ايه ؟ نبطلها اسبوعين و نرجع نقدمها تاني .. طب لو برضه حساسية .. نعيد تاني .. نفضل نعمل كدا لمدة 5 مرات مثلا اللي هم كدا 10 اسابيع .. انا معرفش طفل حصل معاه كدا الا و الحساسية راحت .. لو عملتي كدا و ابنك فضلت معاه الحساسية يبقى وقتها نروح لدكتور و نعمل اختبارات حساسية بقى و ندخل في قصص الحساسية .. لكن في وجهة نظري مش قبل كدا ..

ثالثا .. هناكل ايه ؟ كل حاجة ممكن تتاكل الا العسل و اللبن البقري الغير مغلي .. غير كدا اي حاجة تتاكل .. انا مش بنصح بالسكريات الصناعية او الاكل الصناعي .. لانه خراب للعيال و السرطان بينتشر في الاطفال عاشان هم اصغر و اسهل في ظهور الامراض كلها عاشان هم اجسامهم اصغر فبتظهر اكتر و اسرع نتيجة للي بيتاكل او بيحصل او بيتشرب .. اي شئ طبيعي .. يعني زبدة فلاحي ماشي .. زبادي من اللبان .. جبنه من اللبان او لبنة يبقى احسن .. بيض بلدي .. محاولة ان كل الاكل يبقى اكل حقيقي اوي اوي اوي .. و انا هحط افكار لوجبات بعدين .. الهدف مش اننا ناكل اكل رجيم .. الهدف اكل صحي .. متاكلوش ولادكم اللي كملوا سنة اي حاجة مكتوب عليها اكتر من خمس مكونات .. يعني زبادي مصنع لا .. جبنة مصنعة لا .. لحوم مصنعة لا .. عصاير فواكه من برا البيت لا .. عصاير الفواكه تكون فواكه كاملة في الخلاط و تتضرب .. لو اتصفت فكدا بيشربوا سكر من غير فوايد .. طبعا شيبسي و بيبسي و كدا مش هحتاج اتكلم .. بطاطس محمرة لا .. بس ممكن نجيب البطاطس المجمدة و نعملها في الفرن هي مش اصح حاجة بس ارحم شويه .. افكار الوجبات هعملهم في بوست تاني

رابعا .. ياكلوا قد ايه ؟ و امتى ؟ انا مش مؤمنة ان ليها معايير الا لو كتير اوي او قليل اوي .. يعني لو ابنك بيزيد جامد اوي تاخدي بالك ان بلاش عيش و رز و مكرونة كتير مثلا .. لو بيزيد قليل اوي ممكن نزود شويه .. يعني عادي انسان طبيعي عادي مع الاهتمام طبعا بالخضار و الفاكهه وانهم 3 وجبات و 2 سناكس .. اوقات الوجبات من الحاجات اللي المجتمع المصري فاشل فيها و بنربي عيال بياكلوا عاشان زهقانين مش عاشان وقت الاكل ده و دي مصيبة مصيبة .. ارجوكم اعملوا وقت لوجبات اطفالكم تبع وقت اكلكم او قبله او بعده زي ما تحبوا بس الاكل ميكنش عرض مستمر .. 3 وجبات و 3 وجبات خفيفة مش قليل طول اليوم خالص .. و نحاول نركز على توازن الوجبة على قد ما نقدر ..

خامسا .. تنظيم بيتاكل قد ايه ده بيحصل بعد السنة خصوصا مع وجود رضاعة عند الطلب .. لان زي ما قريت food before one is just for fun .. يعني دي مرحلة للاكتشاف لان الطفل بياخد كل التغذية من اللبن فاحنا بنلعب و نكتشف و نتعلم ناكل

سادسا .. الحساسيات .. زي ما قولنا لو ظهرت حساسية بنمنع الاكل اسبوعين و بعدين نرجع تاني .. طب ليه منمنعش الاكل اللي هيجيب حساسية اصلا ؟ .. عاشان ده السبب الاساسي في ظهور الحساسيات .. و زيادتهم مؤخرا .. اني ادي ابني او بنتي كل حاجة و بعدين لو ظهرت امنع و اقدم الاكل بعد اسبوعين دي حاجة بتقوي المناعة و بتساعد الجسم على التعود على نوع الاكل ده فميهاجموش تاني .. لكن لو حد عنده استعداد للحساسية و اديناله بعد سنة وقتها رد فعل هيكون اعنف و هيبقى الموضوع خلاص مالوش حل الا بتجنب نوع الاكل ده للابد خلاص .. طبعا في حساسيات واضحة و صريحة و كبيرة دي بتاعت اللي بعد 5 مرات .. بس بجد اول سنة هي الفرصة الكبيرة اللي لينا عاشان نحمي ولادنا من الحساسية و نساعد جسمهم انه يعرف يتعامل معاها صح و ميهاجمش الجسم عاشان الحاجات الغريبة دي .. فالحماية مش اننا نمنع زي ما الناس كانوا مؤمنين من 5 سنين لا الحماية اننا نقدم بعقل و تركيز عاشان نقوي الجهاز الهضمي و المناعي .. بس لازم نقول اننا بندي معلقة و لو اي لون احمر في الوش بان بنوقف و لو لا قدر الله الوش اتنفخ خالص او الشفايف يعني حساسية جامدة اوي اوي .. بنروح المستشفى .. انا بتكلم عن حساسية ان بطن توجع شويه مش كتير .. لون احمر بسيط .. و برضه عاشان كدا بندي من الحاجة الجديدة معلقتين كدا بس .. و في تحت مقالة عن الحساسيات تفصيلية و فيها ان تاخير تقديم الاكل بيزودها مش بينقصها .. برضه مهم اوي تاريخ العيلة في الحساسيات .. يعني مثلا بنعامل الفول بحذر لو فيه تاريخ انيميا فول .. يعني بناخد بالنا من تاريخ العيلة

الحساسيات = تاريخ عيلة + اعراض بسيطة لو كبيرة فلا + معلقتين بس من الحاجة المشكوك فيها + ظهر لون احمر خلاص كفايه و نوقف + نعيد تقديم بعد اسبوعين عاشان نقوي المناعة

سابعا .. ال baby led weaning .. في لينك لادويو كنت مسجلاه عن ال baby led weaning هحط اللينك بتاعه و هعرف هنا ايه هو ال baby led weaning ? هو اننا بنسيب الطفل هو اللي يتحكم في موضوع الاكل و هو اللي يدوق و يجرب و يمصمص من غير اكل بمعلقة او بالاكل بالمعلقة يعني في حاجة ممكن تبقى الطريقة دي بس و في خليط من الطريقتين .. و بنجرب بقى .. و نعمل كل الاكل ممكن يتمسك و طري شويه .. و عاشان اهم موضوع فيه هو موضوع الشرقان .. فبصوا هنعمل ايه ؟ .. خليكوا جنب ولادكم و لو وقف في زورهم حاجة ايتقلبوا على بطنهم و نخبط على الظهر فاللي في الفم هيقع .. الاطفال بيتولدوا من غير gag reflex .. و بيكتسبوه مع الوقت .. مشكلة من مشاكل التاكيل بالمعلقة بس انهم مش بيستخدموا العضلة دي فمش بتنموا بسرعة لان التمرين بتاعها انها يتعلموا ان الاكل يبقى ورا و يتطرد لقدام ازاي .. فاحنا بناخد ان احجام القطمات او اصابع الاكل دي متناسبة يعني لو قطمت كبير اوي طلعيه لو صغير تمام .. و نفضل جنبهم و هم بياكلوا اول فترة .. و ناكل معاهم او قدامهم مرة في مرة مش هتشرق خالص .. و العضلة هتبقى تمام في وقت سريع فعلا .. و المفروض ان الاكل عامة يبقى طري اوي بيتمصمص .. الهدف برضه ان متاكلش اوي و تكتشف و ده بيحصل في مص الحاجة و العض عليها او الرضاعة منها كدا .. دي طريقتهم في الاول .. فكله بالمصمصة الاول و بعدين هيقطموا و بعدين هيتفوا و يرموا الاكل و بعدين هياكلوا عاشان كدا الطريقة دي اكتر طريقة مؤمنة ان food before one is just for fun .. و التغذية بتيجي من الرضاعة عند الطلب و بس كدا .. او تقديم اللبن عند الطلب للامهات اللي مش بيرضعوا .. طبعا في ضمن نطاق المسموح بيه في اللبن الصناعي ..

ده لينك الادويو https://allmuze.com/record/view/59afad9cf69ba56ca4553173?refuid=591594011fa41f12109f1a7d

الموضوع ده مهم عاشان في امهات فعلا بيقضوا ليالي عياط و صريخ و نكد ايام و ليالي عاشان موضوع اكل اطفالهم .. ارجوكم متعملوش كدا في نفسكم .. ارجوكم .. انا كنت كدا و لما قررت اني مش هضغط على نفسي و لا ابني و بدأت baby led weaning اعصابي هديت و بقيت مؤمنة ان محدش هيموت من الجوع و انه هيتعلم و هيعرف و طالما وزنه في الطبيعي خلاص مش مهم الاطفال يكونوا تختوخين عاشان يكونوا حلوين يعني .. ابنك مبسوط و صحته كويسه خلاص .. الكلام ده قبل السنه بعد السنة لو مالكوش كويس ممكن يبقى السبب سكر كتير و حلويات كتير او طريقة الاكل مش صح .. تنظيم الوجبات و اننا نسيبهم يخدوا مسئولية اكلهم في وجهة نظري احسن حاجة .. و اريح حاجة .. ممكن نساعد انا ساعات باكل ابني بالمعلقة عادي بس يبقى هو مستعد و مش متدايق و عايز مساعدتي .. لان الغصب و الصريخ و النكد مش حل خالص .. لو الموضوع اتحل بهدوء في مرحلة ما ابنك او بنتم هيقرروا يقلدوكي و ياكلوا زيك و يفكروا و يتغدوا معاكي ..

بس كدا دي كل افكاري و تجربتي ..

منتظرة كل الاسئلة يللا 😀

ليلتكم سعيدة 😀

المصادر https://www.mamanatural.com/baby-led-weaning/

Welcome to Baby Led Weaning

https://www.babycenter.com/0_food-allergies_12409.bc

http://www.parents.com/baby/health/allergy/introducing-solids-to-prevent-allergies/

| Homemaker | Woman | Wife | Mum | Blogger | Supporting new moms, Passing knowledge & sharing positive vibes.
Leave a Reply

Your email address will not be published. Required fields are marked *