تعافي ما بعد الولادة

كتبت مريم إبراهيم

عن تعافي ما بعد الولادة

تعافي بعد الولادة حاجة بتاخد نفس وقت الحمل .. ده الوقت المتوقع .. جسمك عمل انسان في ٩ شهور .. و هيرجع لطبيعته في ٩ شهور .. مش قبل كدا ..

ايه اهم حاجات نفكر فيها في التعافي؟

١- التوقعات .. ايه التوقع الطبيعي لام لسه والدة؟

ان هي تنام و البيبي ينام .. بس كدا .. ده اهم توقع .. اي حاجة تانيه مش مهم فعلا يا حبايبي والله .. مفيش اي حاجة اهم من كدا .. و شويه بشويه شغل البيت هيجي و الطبيخ هيجي .. بس مينفعش ام تولد من ٣ ايام و عايزه تقوم تروق .. ارحموا نفسكم والله .. بشويش كدا و دلعوا نفسكم .. الموضوع بيحتاج راحة و ده الطبيعي مش عيب و مش حرام و مش معناه اي حاجة

٢- الشخص الداعم او مجموعة الدعم .. الحد اللي هيمتصنا .. اللي عارف السواد .. اللي ممكن يسمع اي حاجة من غير ما يحكم او يقول بتستهبلي او بتكبري الموضوع .. جلسات الدعم النفسي مهمة جدا .. و بتاثر اوي اوي .. خصوصا لو في مجموعات عاشان احساس الست انها مش لوحدها ده مهم اوي .. انا مش كدا لوحدي .. دي طبيعة المرحلة .. الولادة زي دور البرد الفرق اننا حافظين مراحل دور البرد و عارفينها كويس اوي .. بس الولادة منعرفهاش و منعرفش ايه صح فيها .. بس سوا في الجروب او هنا هنعرف و هنرتاح لما نعرف اننا مش لوحدنا و ان كلنا بنحاول و بنطبطب على بعض و بنتعكز على بعض

٣- الفيتامينات .. كتير بيبطلوا فيتامينات بعد الولادة .. الصح اننا نعمل صورة دم كاملة ووظايف كل حاجة .. و كالسيوم و حديد و فيتامين د و ناخد فيتامينات زي وقت الحمل طول وقت الرضاعة .. الفيتامينات مهمة جدا عاشان نعوض اللي بنخسره ة متاثرش على اي حاجة

٤- تنظيم يوم البيبي .. تنظيم نومه من اول فتره .. ينام بليل و يصحصح في النهار .. لما نوم الطفل يتنظم الام هترتاح اكتر .. هتلاقي وقت .. تنظيم نوم الاطفال له تسجيل صوتي على الجروب و له مقاله على الصفحة و مهم اوي

٥- توقعات الاهل و الزوج .. ارجوكم ارحموا اللي لسه والدة .. اي توقعات غير مطلوبة منها تماما .. شجعوها ترتاح و ريحوها و ادعموها و خليها تثق في نفسها .. انتم الاهل و الروح و الحماية و السند .. اقروا و اعرفوا عن المرحلة عاشان تعرفوا تساعدوها اكتر ..

٦- نعرف ان الطبيعي وجود مشاكل في الرضاعة .. مش طبيعي ابدا ان الرضاعة تحصل بدون مشاكل .. الرضاعة بتاخد وقتها و بمساعدة استشارية رضاعة الموضوع بيكون الطف و احسن .. خلوا توقعات الرضاعة واقعيه جدا .. و اعرفوا ان القلق اكتر حاجة بتاثر على الرضاعة .. اكتر من الاكل و الشرب ..

دي اهم حاجات للتعافي .. ربنا معانا كلنا و الفترة بتعدي و لو اتعلمنا صح اللي بعدها بيكون اسهل و احسن .. و الست فعلا بتتحول ل super woman

يومكم جميل

| Homemaker | Woman | Wife | Mum | Blogger | Supporting new moms, Passing knowledge & sharing positive vibes.
Leave a Reply

Your email address will not be published. Required fields are marked *